Matagumpay na nailunsad ng Pamahalaang Panlalawigan ng Palawan ang Human Papillomavirus (HPV) Immunization sa bayan ng El Nido na ginanap nitong nakalipas na Nobyembre 11, 2023 sa pamamagitan ng Provincial Health Office (PHO) katuwang ang Department of Health (DOH), LGU El Nido, Department of Education (DepEd)- Palawan at Merck Sharp & Dohme (MSD).

Ilan sa mga dumalo at nagbigay mensahe sa aktibidad ay sina Executive Assistant IV (Special Assistant to the Governor) Engr. Bonifacio M. Madarcos bilang kinatawan ni Gob. V. Dennis M. Socrates; Board Member Ma. Angela V. Sabando; Municipal Administator Raffy G. Cabate bilang kinatawan ni Mayor Edna G. Lim; Vice Mayor Luningning L. Batoy; Sangguniang Bayan Member Ernesto D. Lajallab, Chairperson ng Committee on Health; Municipal Health Officer Dr. Jo-Ann P. Huerto; El Nido del Norte Public Schools District Supervisor Lutgarda S. Juanich, at Mr. Ken Reyenolou A. Remollo ng Department of Health (DOH) Center for Health Development (CHD) MIMAROPA.

Bilang bahagi ng aktibidad na may temang “Sa Aking Paglaki, Walang HPV!” ay tinalakay ni Dr. Hannah Suzane L. Kikuchi ang topikong “Ano ang HPV at Sakit na Naidudulot Nito” na sinundan naman ng Ceremonial Vaccination habang nagsagawa rin ng S.H.I.E.L.D Against Cervical Cancer bilang Commitment Exercise kung saan nakibahagi rin ang mga ahensyang nabanggit.

Layunin ng naturang aktibidad na mapataas ang kaalaman ng mga mamamayan patungkol sa kahalagahan ng HPV vaccination para sa mga kabataan na may edad 9-13 taong gulang upang maiwasan ang sakit na cervical cancer gayundin ang kahalagahan ng multi-sectoral approach/collaboration sa pagpapataas ng estado ng kalusugan sa lalawigan na isa sa mga prayoridad ng administrasyon ni Gob. Socrates.